На ден 12 јули 2018 година, директорот на Дирекцијата за радијациона сигурност г-дин Светислав Ѓорѓевиќ беше во работна посета на Агенцијата за заштита од јонизирачко зрачење и нуклеарна сигурност на Република Србија.
На 4 и 5 јули 2018 година, во просториите за обука за радијациона заштита и сигурност на Дирекцијата за радијациона сигурност, се одржаа семинари од предавачи од Универзитетот во Лиеж – Белгија и Институтот за радиоелементи во Флеурус – Белгија, на тема „Управување со радиоактивен отпад во нуклеарна медицина и терапија со радиоактивен јод“ и „Мониторинг на отпаден метал“. Семинарите се организираа од страна на Дирекцијата за радијациона сигурност во рамки на билатералната соработка на Република Македонија и Кралството Белгија и истите се финансирани од Министерството за економија на Кралството Белгија.
На ден 06.06.2018 година Дирекцијата за радијациона сигурност прими донација од Амбасадата на Соединетите Американски Држави во Република Македонија преку Програмата за контрола на извозот и граничната безбедност (EXBS), која се состои од лаптоп комјутери и систем за озвучување.
Во 6 јуни 2018 година во просториите на Дирекцијата за радијациона сигурност се потпиша Меморандум за разбирање помеѓу Дирекцијата за радијациона сигурност на Република Македонија и Агенцијата за радијациона заштита и нуклеарна сигурност на Република Косово за соработка во полето на радијационата заштита и нуклеарна безбедност. Меморандумот беше потпишан помеѓу директорот на Дирекцијата за радијациона сигурност на Република Македонија г-дин Светислав Ѓорѓевиќ и директорот на Агенцијата за радијациона заштита и нуклеарна сигурност на Република Косово г-дин Беќир Мезелџиу (Beqir Mezelxhiu), во присуство на претставници од Амбасадaта на САД во Република Македонија г-дин Џорџ Кларк (George Clarke) и г-ѓа Фросина Ивановска.
Во периодот 24-25 мај 2018 година во Брисел, Белгија се одржа завршен состанок во рамките на ИПА проектот „Понатамошно зајакнување на техничкиот капацитет на нуклеарните регулаторни тела во Албанија, Босна и Херцеговина, Македонија, Црна Гора и Србија, како и Косово“.
На 23 мај 2018 година во Меѓународната агенција за атомска енергија во Виена, делегација од Дирекцијата за радијациона сигурност на Република Македонија во состав Светислав Ѓорѓевиќ – директор на Дирекцијата за радијациона сигурност, Трифче Сандев и Горан Трајков, учествуваа на 6-тиот состанок за прегледување на Извештаите на земјите пристапнички на Заедничката конвенција за сигурност при управување со искористено нуклеарно гориво и сигурност при управување со радиоактивен отпад.