На покана на Агенцијата за нуклеарна енергија на Република Бугарија во периодот од 23 до 25 септември во Сандански, Република Бугарија се одржа состанок помеѓу делегациите на регулаторните тела за радијациона сигурност и нуклеарна безбедност од Бугарија, Кипар, Грција и Северна Македонија. Македонската делегација беше предводена од директорот на Дирекцијата за радијациона сигурност, г-дин Зоран Бајовски. Состанокот беше прв од овој вид и целта на истиот беше размена на искуства и добри практики помеѓу регулаторните тела, зајакнување и продлабочување на соработката помеѓу соседните држави во областа на радијационата сигурност и нуклеарна безбедност, како и воспоставување на поактивни работни односи.
За време на дискусиите беа разменети искуства, добри практики и идеи во насока на идна соработка во областите на хармонизација на националните законодавства со законодавството на ЕУ; спроведување на инспекциски надзори; управување со радиоактивен отпад; контрола на граничните премини во однос на нелегална трговија со радиоактивни материјали и комуникација; подготвеност и одговор во случај на радијационен вонреден настан.
Иницијативата беше поздравена од страна на сите делегации во однос на значителниот придонес на истата во воспоставување и одржување на мрежа на соработка во регионот и постигнување на заедничката цел на регулаторните тела за воспоставување и одржување на високи стандарди на заштита на населението и животната средина.
